ഇതാണോ പ്രണയം

ഇതാണോ പ്രണയം
Ethano Pranayam Author : Anamika Anu

കണ്ണുകൾ തുറക്കാൻ ഗൗതം നന്നേ പാട്പെടുന്നുണ്ടായിരുന്നു. എങ്കിലും പതിയെ തുറന്നു. ചുറ്റും കണ്ട കാഴ്ചകളിൽ നിന്നും മനസിലായി ഹോസ്പിറ്റലിൽ ആണെന്ന്. കൈ ഉയർത്താൻ ശ്രമിച്ചപ്പോഴാണ് എന്റെ കയ്യിൽ തല ചേർത്തു ഉറങ്ങുന്ന ഒരു പെൺകുട്ടിയെ കണ്ടത്.

തനിക്കു ചുറ്റും എന്താ നടക്കുന്നെന്ന് ഗൗതമിനു ഒന്നും മനസിലായില്ല. ശരീരം ആകെ ഒരു വേദന പോലെ. കൈ പതിയെ പുറകിലേക്ക് എടുക്കാൻ ശ്രമിക്കവേ ആ കുട്ടി ഞെട്ടി എഴുന്നേറ്റു.

അപ്പോഴാണ് ഗൗതം ആ മുഖം കണ്ടത്. കണ്ണുകൾ വീങ്ങിയിരിക്കുന്നു. ഉറക്കമൊഴിച്ച നല്ല ലക്ഷണം. എങ്കിലും ആ കണ്ണുകൾ ഗൗതമിന്റെ നെഞ്ചിൽ തറച്ച പോലെ അവനു തോന്നി.

എങ്കിലും ഒരു പരിചയം ഇല്ലാത്ത എനിക്ക് വേണ്ടി ഉറക്കം ഒഴിയാൻ ഇവൾ ആരാ? ഞാൻ എങ്ങനാ ഇവിടെ എത്തിയത്?
ഗൗതം ഒന്നും മനസിലാകാതെ ആ കുട്ടിയുടെ കണ്ണിലേക്കു തന്നെ നോക്കി. വാലിട്ടെഴുതിയ കണ്ണുകളിൽ നിന്നും കരി ഒലിച്ചിറങ്ങിയിരിക്കുന്നു. തുടുത്ത കവിളുകൾ. ചുവന്ന ചുണ്ടുകൾക്ക് മുകളിൽ വിയർപ്പു കണങ്ങൾ ആശുപത്രിയിലെ ലൈറ്റിൽ തിളങ്ങുന്നുണ്ടായിരുന്നു. കുട്ടീടെ കയ്യിലേക്ക് നോക്കിയപ്പോൾ ചുവന്ന കട്ടിയുള്ള ചരടിന് മുകളിൽ അത്ര തന്നെ വലുപ്പത്തിൽ ചുവന്ന വിരൽ പാടുകൾ.

തലേന്ന് നടന്നത് ഓർക്കാൻ ശ്രമിക്കവേ അവന്റെ തലയ്ക്കു ഒരു തരിപ്പ് പോലെ. വേദനിച്ചു അവൻ തലയിൽ കൈ വച്ചു വിളിക്കാൻ തുടങ്ങി.

പെട്ടന്ന് തണുത്ത വിരലുകൾ അവന്റെ നെറ്റിയിൽ പതിഞ്ഞത് അവൻ അറിഞ്ഞു. വേദന എങ്ങോട്ടാ പോയതെന്ന് പോലും അവൻ പിന്നെ അറിഞ്ഞില്ല.

അപ്പോഴാ കഞ്ഞിയിൽ പാറ്റ ഇട്ടുകൊണ്ട് എന്റെ പുന്നാര ചങ്ക് രാഹുൽ ഒരു ഫ്ലാസ്കും ആയി വന്നത്. അവൾ കൈ എടുത്തു.

“ആ നീ എണീറ്റോ? ഇപ്പോൾ എങ്ങാനുണ്ടെടാ? സുഖം ഉണ്ടോ? ചായ തരട്ടെ? കഞ്ഞി കുടിക്കുന്നോ? “

എന്റെ കഞ്ഞിയിൽ പാറ്റ ഇട്ടിട്ടു കഞ്ഞി വേണോന്നു ചോദിക്കുന്നു ദുഷ്ടൻ. പണ്ടേ ഇവന്റെ ടൈമിംഗ് ശെരിയല്ല. ഗൗതം മനസ്സിലോർത്തു.

രാഹുൽ :”കുട്ടി പൊയ്ക്കോളൂ. താങ്ക്സ്. ചായ കുടിക്കുന്നോ? “

ഇല്ല എന്നാ അർത്ഥത്തിൽ അവൾ തല ചെറുതായി അനക്കി.
ഒന്നും മിണ്ടാതെ അവൾ നടന്നു. അവൾ പോകുന്നതും നോക്കി ഗൗതം കിടന്നു.

രാഹുൽ :” ഇന്നലെ എന്തൊക്കെയാ കാട്ടിയെന്ന് വല്ലതും ബോധം ഉണ്ടോടാ നിനക്ക്. പനി തുടങ്ങിയപ്പോഴേ നിന്നോട് ഹോസ്പിറ്റലിൽ പോകാന്നു ഞാൻ പറഞ്ഞതല്ലേ. എന്നിട്ട് അതൊന്നും കേൾക്കാതെ അവിടെ കിടന്നേക്കുന്നു. രാത്രിയിൽ പനി കൂടി നിന്നെ ഇവിടെ കൊണ്ട് വന്നപ്പോൾ നിനക്ക് ഒട്ടും ബോധം ഇല്ലാരുന്നു. ഇപ്പോഴാണ് എനിക്ക് സമാധാനം ആയതു. “

ട്രെയിൻ പോലെയുള്ള അവന്റെ പ്രസംഗംകേൾക്കുമ്പോഴും ഗൗതം കാതോർതത്ത അഞ്ജന മിഴികളുടെ ഉടമയെ കുറിച്ച് കേൾക്കാനായിരുന്നു. കാട് കേറി എന്തൊക്കെയോ രാഹുൽ പറഞ്ഞു. അല്ലേലും ഇവൻ ആവശ്യം ഉള്ളത് പറയില്ലാന്നു ഓർത്തുകൊണ്ട് ഗൗതം ക്ഷമ നശിച്ചു ചോദിച്ചു

“ഏതാടാ ആ കുട്ടി? “

രാഹുൽ :” ഓ അതോ നീ ഇന്നലെ ഇവിടെ എത്തിയപ്പോൾ ഭയങ്കര ബഹളം ആയിരുന്നു. കയ്യും കാലും ഇട്ടടിച്ചു പിച്ചും പെയ്യും പറഞ്ഞു. ഞാൻ ആകെ പേടിച്ചു പോയി.

ആ കുട്ടി ഷിഫ്റ്റ്‌ കഴിഞ്ഞു ഇറങ്ങാൻ തുടങ്ങിയപ്പോഴായിരുന്നു നിന്റെ ബഹളം. ട്രിപ്പ് ഇടാൻ ഡോക്ടറെ സഹായിക്കാൻ ആ കുട്ടി വന്നു. ഡോക്ടർ തല കുത്തി നിന്നിട്ടും നിന്റെ ബഹളം കാരണം പറ്റുന്നുണ്ടായിരുന്നില്ല. നിന്റെ കൈ പിടിച്ചു വയ്ക്കാൻ നോക്കിയപ്പോൾ നീ ആ കുട്ടിയുടെ കയ്യിൽ മുറുകെ പിടിച്ചു. അപ്പോഴാ അവർ ട്രിപ്പ്‌ ഇട്ടത്. എന്നിട്ടും നീ അവളുടെ കൈ വിട്ടില്ല. എന്ത് പിടിയാടാ പിടിച്ചേ? “

ഗൗതം അത് കേട്ടു ഒന്ന് ചിരിച്ചു പോയി.

“ചെങ്കൊടി ആണെന്ന് കരുതി കാണുമെടാ”

ഗൗതമിന്റെ മറുപടി കേട്ടു രാഹുൽ പറഞ്ഞു

“മണ്ണാങ്കട്ട . ഡ്യൂട്ടി കഴിഞ്ഞു വീട്ടിൽ പോയി ഉറങ്ങാൻ പോയ കൊച്ചിനെയാ നീ കയ്യിൽ പിടിച്ചു ഇവിടെ ഇരുത്തിയിരുന്നത്. പാവം കുറച്ചു മുന്നെയാ ആ സൈഡിൽ ഒന്ന് തല ചായ്ച്ചത്. അതിനു വേണ്ടി ചായ മേടിക്കാൻ പോയതാ ഞാൻ. അപ്പോഴേക്കും നീ ഉണർന്നു “

ഗൗതമിന്റെ മനസ്സിൽ അപ്പോഴും ആ ക്ഷീണിച്ച കരിമഷി കണ്ണുകൾ ആയിരുന്നു.

” കിടന്നു സ്വപ്നം കാണുന്നോ. വാ പതിയെ എണീറ്റു ഈ ചായ കുടിക്കു. “

ഗൗതം :” എന്ത് കണ്ണുകളാടാ അത്? ഇപ്പോഴും മനസ്സിൽ നിന്നും പോകുന്നില്ല. എന്തോ ഒരു പ്രത്യേകത “

രാഹുൽ :” ആരുടെ കണ്ണ്?? ദൈവമേ ഇവൻ വീണ്ടും പിച്ചും പെയ്യും പറയുന്നോ? “

ഗൗതം :”പോടാ. ഞാൻ ആ നഴ്സിന്റെ കാര്യമാണ് പറഞ്ഞത്. ആരാന്നു പോലും അറിയാത്ത ഒരാൾക്ക് വേണ്ടി ഉറക്കം കളഞ്ഞ ആ കണ്ണുകൾ ഇന്ന് എന്റെ മനസ്സും കൊണ്ടാണല്ലോ പോയത്. ഇതാണോടാ പ്രണയം. “

രാഹുൽ :” കുന്തം. കാണാൻ കൊള്ളാവുന്നൊരെ കാണുമ്പോൾ എല്ലാ മനസുകൾക്കും ഇങ്ങനെ തോന്നും. മിണ്ടാതെ ചായ കുടികെടാ. “

ഗൗതം :” ഇന്നോളം എന്റെ മനസ്സ് കവർന്നത് ചെങ്കൊടി ആയിരുന്നില്ലെടാ. പക്ഷെ ഇപ്പോൾ എനിക്കറിയില്ല. ആ കണ്ണുകൾ….. എനിക്ക് അവളെ കാണണം. ടാ പ്ലീസ്… “

കയ്യിലിട്ടിരുന്ന ട്രിപ്പ്‌ ഊരി കളഞ്ഞു ചാടി എണീറ്റ ഗൗതമിനെ തടഞ്ഞുകൊണ്ട് രാഹുൽ പറഞ്ഞു

“നിനക്ക് എന്താടാ ഭ്രാന്തായോ? നീ അവിടെ അടങ്ങി കിടന്നേ. അവൾ വീട്ടിൽ പോയി. നിനക്ക് എന്താ വേണ്ടേ? കാണണം അത്ര അല്ലെ ഒള്ളു. അവൾ നാളെ വരുമായിരിക്കും. “

രാഹുൽ അവനെ ബലമായി പിടിച്ചു കട്ടിലിൽ ഇരുത്തി.

“ടാ അവളുടെ പേര് എന്തായിരിക്കും? എവിടെ ഉള്ളതായിരിക്കും. നാളെ വരുമായിരിക്കും അല്ലെ? “

രാഹുൽ :”നീ ഇത് കുടിക് ഞാൻ ഇപ്പോൾ വരാം “

കുറച്ചു കഴിഞ്ഞു രാഹുൽ ഓടി വന്നു ഗൗതമിന്റെ അടുത്ത ഇരുന്നു.

“കിട്ടിയെടാ. അവളുടെ പേര് നയന “

ആദ്യമായി ഇവനെ കൊണ്ട് ഒരു ഉപയോഗം ഉണ്ടായല്ലോ ദൈവമേ എന്ന് മനസ്സിൽ പറഞ്ഞു കൊണ്ട് ഗൗതം പതിയെ പറഞ്ഞു

“നയന.. നയന ഗൗതം “

രാഹുൽ :” അവൾ ഇവിടെ ട്രെയിനി ആയി കേറിയിട്ടു രണ്ടു മാസം ആകുന്നേയുള്ളു. ഇവിടെ അടുത്താ വീട്.

പക്ഷെ….. “

“പക്ഷെ എന്താടാ “

ഗൗതം ചോദിച്ചു

“നാളെ ആ കുട്ടി വരില്ലടാ. നിന്നെകാരണം ഷിഫ്റ്റ്‌ ആകെ ചേഞ്ച്‌ ആയി. അതോണ്ട് മറ്റന്നാൾ നെറ്റിനെ വരു. “

ഗൗതം :”മറ്റന്നാൾ വരുമല്ലോ. ഞാൻ ഇവിടെ ഉണ്ടെല്ലോടാ. എനിക്ക് ഒന്ന് കാണണം. “

രാഹുൽ : ” അല്ല അളിയാ. വരുന്ന വഴി ഡോക്ടറെ കണ്ടിരുന്നു. നിന്നെ ഇന്ന് ഡിസ്ചാർജ് ചെയ്യാമെന്ന് പറഞ്ഞു.മരുന്ന് ഫർമസിയിൽ നിന്നും വാങ്ങിയാൽ മതിയെന്ന് പറഞ്ഞു. കൂടുവാനെങ്കിൽ വന്നാൽ മതിയെന്നും. “

ഗൗതമിന്റെ മുഖം വാടി. അത് കണ്ടു രാഹുൽ പറഞ്ഞു.

“സാരമില്ലെടാ നമുക്ക് രാത്രി വരാമെന്നേ “