“ദേവകി… അവൻ ഇതുവരെ നല്ലൊരു വാക്കുപോലും ആ കൊച്ചിനോട് പറയുന്നത് ഞാൻ കേട്ടിട്ടില്ലല്ലോ…. ഇതിപ്പോ ഈ കല്യാണം നമ്മൾ അവനെ നിർബന്ധിച്ചു അടിച്ചേൽപ്പിച്ചു എന്നൊരു തോന്നൽ ഉണ്ടായോ….. അതാണോ അവൻ ഇങ്ങനെ സ്വയം ശിക്ഷിക്കുന്നപോലെ….. ” കയ്യിലിരുന്ന കണ്ണട മുണ്ടിന്റെ തലയ്ക്കൽ ഒന്ന് തുടച്ചു രാഘവൻ വീണ്ടും കണ്ണിൽ വെച്ചു…..
” എനിക്കൊന്നും അറിയില്ല… ശെരിയാണ് അവന്റെ സങ്കടത്തിൽ നിന്നും അവനിതുവരെ കാരകേറിയിട്ടില്ല…. അത് വകവെക്കാതെ അന്ന് ഞാനാണ് അവനെ നിർബന്ധിച്ചത്….. അതിനു അവൻ ഇതുവരെ ഒരു പരാതിപോലും പറഞ്ഞിട്ടില്ല…. പക്ഷെ എന്റെ കുട്ടി നാളിതുവരെ ഒന്ന് സന്തോഷിച്ചു ഞാൻ കണ്ടിട്ടില്ല…. ഇങ്ങനെപോയാൽ നമ്മൾ അച്ഛന്റെയും അമ്മയുടെയും കാലം കഴിയുമ്പോ ഇതെവിടെച്ചെന്നു നിൽക്കും….. ആ കുട്ടിക്കും ഉണ്ട് സങ്കടം അത് പുറത്തു പറയുന്നില്ല എന്നേയുള്ളു…. ” അതും പറഞ്ഞു ഭാനുമതിയമ്മ കണ്ണിൽ നിന്നുതിർന്ന കണ്ണുനീർ തുടച്ചു….
സുരേഷിന്റെ കല്യാണം കഴിഞ്ഞു രണ്ടുമാസം കഴിഞ്ഞിരുന്നു….സന്തോഷം കളിയാടേണ്ട സമയം ഈ അച്ഛനും അമ്മയും ഒരു പേരക്കുട്ടിയെ കാത്തിരിക്കേണ്ട സമയം വിലപിച്ചു തീർക്കാനാണ് ഇന്ന് കണ്ടെത്തുന്നത്…..
ഈ സമയത്താണ് സുരേഷ് ജോലി കഴിഞ്ഞു വരുന്നത്…. വന്നാൽ ഉടനെ അവൻ അമ്മയോട് കാര്യങ്ങൾ എല്ലാം പറയും… ഭാര്യ അനുപമ അടുത്തുണ്ടെങ്കിലും അമ്മയോട് പറഞ്ഞു അവൻ വേഗം കുളിക്കാൻ കയറും….
പക്ഷെ അനുപമ ഒന്നും പരിഭവിച്ചില്ല അവൾ ഒരു പരാതിയും ഇല്ലാതെ അവളുടെ കടമകൾ ചെയുന്നു…. ഒരു ഭാര്യയെന്ന രീതിയിൽ തന്റെ ദേഹത്ത് ഒന്ന് തൊടാതെ ഒരു കട്ടിലിൽ ശ്രദ്ധിച്ചു കിടക്കുന്ന സുരേഷിനെ അവൾക്കിപ്പോ ശീലമായ പോലെ ആയിരിക്കുന്നു… അയല്പക്കത്തെ സംസാരങ്ങളിൽ വിശേഷം ആയില്ലേ എന്നാ ചോദ്യശരത്തിൽ നിന്നും അവൾ ഒഴിഞ്ഞുമാറും…..
ആ ചോദ്യം പിന്നീട് നീളുക അമ്മയിലേക്കാകും….
ചിലർ സംശയങ്ങൾ എറിഞ്ഞുതുടങ്ങുമ്പോൾ അതിനുള്ള മറുപടിയും അമ്മ കൊടുക്കും…..
അന്നും പതിവ് പോലെ അമ്മയോട് സംസാരിച്ചു കുളിക്കാൻ പോകും നേരം അമ്മ അവനോടു പറഞ്ഞു….
” മോനെ…. അമ്മയ്ക്ക് നിന്നെ അറിയാം നിന്റെ വിഷമങ്ങളും…. എന്നുവെച്ചു നീ ഇന്നൊരു ഭർത്താവാണ്…. നിന്നെ വിശ്വസിച്ചു നിന്റെ താലിയിൽ ജീവിതം തീർക്കുന്ന ഒരു പെണ്കുട്ടിയുണ്ട് ഇവിടെ ഒരു പാവം മോളാണ് അത്…. അതിനെ വിഷമിപ്പിക്കല്ലേട….
ഒരമ്മയ്ക്ക് നിന്നോട് ഇത്രയേ പറയാൻ കഴിയൂ….. നീ കേൾക്കണം….. ”
നടന്നു തുടങ്ങിയ അവൻ ഒന്ന് നിന്നു….. അമ്മയുടെ മുഖത്തു നോക്കാതെ അവൻ പറഞ്ഞു…
” എനിക്കറിയാം….. അവളോട്‌ എനിക്ക് ദേഷ്യമൊന്നുമില്ല….പക്ഷെ ഞങ്ങളെ അകറ്റി നിർത്തുന്ന എന്തോ ഒന്ന് അതാണ് ഞങ്ങൾ പരസ്പരം അന്യരാകുന്നത്…… ”
അവൻ നടന്നു കുളിമുറിയിൽ കയറി വാതിൽ അടച്ചു….. പൈപ്പ് തുറന്നിട്ടു…..
മേല് വെള്ളം ഒഴിച്ചു കഴിഞ്ഞപ്പോഴാണ് തലയിൽ എണ്ണ ഒഴിക്കാൻ മറന്ന കാര്യം ഓർത്തത്…. അവൻ വേഗം അമ്മയെ വിളിച്ചു……
അമ്മ പുറത്തെവിടെയോ ആയിരുന്നത് കൊണ്ട് അത് കേട്ടത് അവളായിരുന്നു….. അവൾ എണ്ണയും ആയി വാതിലിന്റെ പുറത്തു നിന്നു… പുറത്തു അമ്മ എത്തിയെന്ന് കരുതി ഒരു തോര്തെടുത്ത അവൻ വാതിൽ തുറന്നു….
ആദ്യം അവൻ ഒന്ന് ഞെട്ടിപോയിരുന്നു…. അവൻ പറഞ്ഞു
“കൈയിലൊക്കെ വെള്ളമാണ്…. ഇതൊന്നു തലയിലൊന്ന് തേച്ചു തരോ ”
അവൾ കുപ്പി തുറന്നു അവന്റെ തലയിൽ എണ്ണ തേച്ചുകൊടുത്തു….. അവൻ അത് കഴിഞ്ഞു വീണ്ടും കുളിക്കാൻ കയറി…..
അനുപമ ശെരിക്കും മനസ്സാൽ ഒന്ന് സന്തോഷിച്ചു…. അറിയാതെ ആണെങ്കിലും അവളെ ഒന്ന് വിളിച്ചതിൽ ഒരുകാര്യം ചെയ്യാൻ ആവശ്യപ്പെട്ടതിൽ അവൾ മനസ്സറിഞ്ഞു ദൈവത്തിനു നന്ദി പറഞ്ഞു……
അതെ സമയം കുളിക്കാൻ കയറിയ സുരേഷ് ആലോചനയിലായിരുന്നു….. തന്റെ ആദ്യത്തെ പ്രണയമായിരുന്നു അവനെ അലട്ടിയത്…. ഒരുപാട് സ്നേഹിച്ച രേണുകയെ തന്റെ അച്ഛനും അമ്മയ്ക്കും അവൻ പരിചയപ്പെടുത്തിയിരുന്നു…. ആ ബന്ധത്തിന് തന്റെ അച്ഛനും അമ്മയും സമ്മതിക്കില്ല എന്ന് പറഞ്ഞു അവള് തന്നെ ആ ബന്ധം അവസാനിപ്പിക്കുകയാണ് ചെയ്തത്….. പിന്നെ അറിഞ്ഞു അവൾ കല്യണം കഴിഞ്ഞു ഓസ്‌ട്രേലിയയിൽ സെറ്റിൽ ആയെന്നു….
മരണത്തിന്റെ വായിൽ പോയി തിരിച്ചെത്തിയ ജീവിതമായിരുന്നു
സുരേഷിന്…… ആ സംഭവം അവനെ വല്ലാതെ ഉലച്ചു….. ഒരുപാട് സമയമെടുത്തു അതിൽ നിന്ന് അവൻ തിരിച്ചുവരാൻ…. പിന്നെയായിരുന്നു അനുപമയുമായുള്ള വിവാഹം……
തലയിൽ വെള്ളം ഒഴിച്ചു തോർത്തുമ്പോൾ നെഞ്ചിലെ ഒരു മുറിവ് അവനെ വല്ലാതെ വേദനിപ്പിച്ചു….. അവൻ വേഗം കുളി കഴിഞ്ഞിറങ്ങി…..
രാത്രി അത്താഴം കഴിക്കുമ്പോൾ അവൻ അനുപമയെ നോക്കി…. അവൾ എല്ലാരും കഴിച്ചതിനു ശേഷം മാത്രമേ ഇരിക്കുകയുള്ളു…. അമ്മ ഒരുപാട് അവളെ വിളിക്കും… എന്നാലും അവൾ ഇരിക്കാതെ അപ്പുറത്ത് വാതിലിനോട് ചാരി നിൽക്കും…… അവനെന്തോ അത് ഒരു പ്രശ്നമായി തോന്നി….
അവൻ വിളിച്ചു ” അനുപമേ ദേ ഇവിടെ വന്നിരുന്നു കഴിക്ക്….. ”
പെട്ടന്ന് അത് കേട്ട ഞെട്ടലിൽ നിന്ന് അമ്മയാണ് അവളെ ഉണർത്തിയത്…. അവൾ വേഗം അവന്റെ അടുത്ത് വന്നിരുന്നു….. അമ്മ വേഗം പ്ലേറ്റിൽ അവൾക്കുള്ള ആഹാരവും വിളമ്പി….. അവളും കഴിക്കാൻ തുടങ്ങി….. കണ്ണിൽ തങ്ങി നിന്ന ഒരു കുഞ്ഞു തിളക്കം അവൾ തുടക്കാൻ മറന്നുപോയിരുന്നു….
അന്ന് രാത്രി അമ്മയ്ക്ക് നല്ല പനി പിടിച്ചു….. സുരേഷ് അമ്മയെ ഡോക്ടറെ കാണിച്ചു തിരിച്ചെത്തിയതുമുതൽ അവൾ അമ്മയുടെ അടുത്തുണ്ട്…. നെറ്റിയിൽ തുണിയിട്ടുകൊടുത്തും കാലിന്റെ അടിയിൽ തിരുമ്മിയും…. അമ്മയെ ഒരു മകളെപ്പോലെ കഞ്ഞി നിർബന്ധിച്ചു കുടിപ്പിച്ചും അവൾ അവിടെയിരുന്നു….
ഇതെല്ലാം ദൂരെനിന്ന് നോക്കിക്കാണുന്ന സുരേഷിന് അന്ന് തന്റെ മുറിയിൽ അവളെ ആദ്യമായി മിസ്സ്‌ ചെയ്തു….. ഇതെന്താണ് തനിക്കു പറ്റിയത്…… അവൻ ഓർത്തു…. അറിയില്ല…… അവൾ രാത്രിയിൽ എപ്പോഴോ ആണ് വന്നു കിടന്നത്…. രാവിലെ ഉണർന്നപ്പോൾ കണ്ടതുമില്ല…..
അമ്മയുടെ അസുഖം ഒരുപക്ഷെ തന്നെക്കാൾ ഏറെ തളർത്തിയത്
മറ്റൊരാളെ ആയിരുന്നു എന്നത് അവന് പിറ്റേന്നാണ്‌ മനസ്സിൽ ആയതു…..
അച്ഛൻ BP കൂടി വീണത് തന്നെ വിളിച്ചു പറഞ്ഞത് അനുപമയായിരുന്നു….. ഡോക്ടറെ കാണിച്ചു അമ്മയുടെ അതെ ബെഡിൽ അച്ഛനെയും കിടത്തി താൻ പുറത്തേക്കു പോന്നു….
” രണ്ടാളും അടിയൊന്നും ഉണ്ടാക്കാതെ അടങ്ങി കിടന്നോട്ടോ….. അച്ഛാ അമ്മയ്ക്ക് ഒന്നുമില്ല ഇങ്ങനെ പേടിച്ചാലോ അതിനു….. ഞാൻ കഞ്ഞിയെടുക്കാം” എന്നും പറഞ്ഞു അവൾ പുറത്തേക്ക് പോന്നു….
ഒരു പുഞ്ചിരിയോടെ അച്ഛൻ അമ്മയുടെ നെറ്റിയിൽ തലോടി ചോദിച്ചു “നിനക്ക് ഇപ്പൊ ആശ്വാസം ഉണ്ടോടി….. ”
” അതെന്നെ…. ഇതെന്തിനാ അപ്പോഴേക്കും അതൊക്കെ ഓർത്തു ഓരോന്ന് വരുത്തിവെച്ച ദേ മോളു പറഞ്ഞ കേട്ടില്ലേ അടികിട്ടും എന്ന്….. ” അമ്മ പറഞ്ഞതും കേട്ട് അച്ഛനാകട്ടെ ഒന്ന് ചിരിച്ചൂന്നു മാത്രം……