ജോർഡിയുടെ അന്വേഷണങ്ങൾ 1
Jordiyude Anweshanangal Part 1 രചന : ജോൺ സാമുവൽ
ഉച്ചയ്ക്ക് ഹെഡ്മാസ്റ്ററുടെ മുറിയുടെ മുന്നിലൂടെ പോയപ്പോഴാണ് ഗ്ലിറ്റർ pen കേസ് എന്നിലേക്ക്‌ വരുന്നത്.
ഹെഡ്മാസ്റ്ററിന്റെ മുറിക്കു മുന്നിൽ റിബിൻ മോനെ പിടിച്ചു നിർത്തിയിരിക്കുന്നു.
അവന്റെ മുഖത്ത് നല്ല വിഷമമുണ്ടായിരുന്നു,
ഞാൻ ആരും കാണാതെ അവന്റടുത്ത് ചെന്നു ചോദിച്ചു
” വർത്താനം പറഞ്ഞതിനാണോ ? “
അവൻ ഒന്നും മിണ്ടിയില്ല
പെട്ടെന്ന് ബെല്ലടിച്ചു ഞാൻ ക്ലാസ്സിലേക്ക് കയറി.
അപ്പോഴാണ് എനിക്ക് കാര്യം പിടികിട്ടിയത്.
എബിയുടെ ഗ്ലിറ്റർ പേനയുടെ ക്യാപ് ആരോ മോഷ്ടിച്ചു. റിബിനാണ് അവസാനമായി ഗ്ലിറ്റർ പേന എഴുതാൻ കൊടുത്തതെന്ന് എബി പറഞ്ഞു…
ഞാനെന്റെ സ്ളേറ്റിൽ
എഴുതി
“കേസ് 01- ഗ്ലിറ്റർ പേന “
സ്ലേറ്റിൽ എഴുതിയ വാചകം ഞാൻ എന്റെ സുഹൃത്തായ ബിബിനെ കാണിച്ചു. അവൻ കല്ലുപെൻസിൽ കൊണ്ട് സ്ലേറ്റിൽ ഒരു ടിക് ഇട്ടു.
ഞങ്ങളുടെ ആദ്യ അന്വേഷണമാണിത്. അന്വേഷണത്തിൽ ആ സ്ലേറ്റ് പിടിക്കേണ്ടതും പോയ്ന്റ്സ് നോട്ട് ചെയ്യേണ്ടതും ബിബിനാണ്.
“എവിടെ നിന്നും തുടങ്ങും എന്നതിന് മുൻപ് ആ ഗ്ലിറ്റർ പേനയുടെ ഹിസ്റ്ററി അറിയണം “
ഞാൻ ബിബിനോട് പറഞ്ഞു
“അത് അവന്റെ അങ്കിൾ കുവൈറ്റിൽ നിന്നും കൊണ്ടുവന്നതാണ്, ആ പേനയുടെ ക്യാപ്പിന്റെ കളർ പച്ച, ബോഡി നീല, ക്യാപ്പിന്റെ അറ്റത്തായി ഒരു ഗോൾഡൻ റിങ്ങുണ്ട് “
എന്റെ ചോദ്യത്തിന് ബിബിൻ വ്യക്തമായ ഉത്തരം പറഞ്ഞു
ഞാൻ ശരിക്കും ഞെട്ടി .
How ????
ഞാൻ ബിബിനോട് ചോദിച്ചു,
“രാവിലെ ഓട്ടോറിക്ഷയില് അവന്റെ കൂടെ വന്നപ്പോ അവൻ എല്ലാരോടുമായി ഈ പേനയുടെ കഥ പറയുന്നുണ്ടായിരുന്നു. അതു കേട്ടതാ “
ബിബിൻ പറഞ്ഞു …
അപ്പോൾ റിബിൻ ആയിരിക്കില്ല ആ പേനയുടെ ക്യാപ് കളഞ്ഞതെന്നോ ആണെന്നോ നമ്മൾ ഇപ്പോൾ തീരുമാനിക്കരുത് ബിബിൻ.. അന്വേഷണം ആരുടേം സൈഡ് പിടിച്ചാവരുത്..
ഞാൻ : നമ്മുടെ ഒരു കുസൃതി ഒക്കെ വെച്ച് പേനയുടെ ക്യാപ് കളിക്കുന്നതിനിടയിലോ മറ്റൊരു എവിടെയെങ്കിലും വീണു പോകാനാണ് സാധ്യത…
ബിബിൻ : അങ്ങനെയാണെങ്കിൽ ഗ്രൗണ്ടിലും വരാന്തയിലും മുറ്റത്തും അന്വേഷിക്കാം.
അങ്ങനെ ഞാനും ബിബിനും ഗ്രൗണ്ടും വരാന്തയും മുറ്റവും നന്നായി അരിച്ചു പെറുക്കി, പക്ഷേ ക്യാപ് കിട്ടിയില്ല.
ഞാൻ : അപ്പോൾ ബിബിൻ
ആ സാധ്യത വെട്ടിയെക്ക്..
അവൻ പേന കയ്യിൽ കൊണ്ടു നടക്കുന്നതായി കണ്ടിരുന്നോ ?
ബിബിൻ : ഓട്ടോ യിൽ വെച്ച് ഷിർട്ടിന്റെ പോക്കറ്റിലായിരുന്നു, ക്ലാസ്സിലു വെച്ച് ബോക്സിലായിരുന്നു, ഇന്റെര്വല് ടൈമിൽ നിക്കറിന്റെ പോക്കറ്റിലും
ഞാൻ : യെസ്, നിക്കറിന്റെ പോക്കറ്റ്. നമ്മുടെ കുഞ്ഞി നിക്കറിന്റെ പോക്കറ്റിൽ ഒരു സെല്ലോ ഗ്രിപ്പർ ന്റെ പേന ഇട്ടാൽപോലും പുറത്തേക്കു തള്ളി നില്കും, അപ്പോൾ അതിനേക്കാൾ വലുപ്പമുള്ള ഈ പേന പോക്കറ്റിൽ ഇട്ടാൽ പുറത്തേക്കു ഒരുപാട് തള്ളി നില്കും. അപ്പോൾ നിക്കറിലിട്ട് നടന്ന സമയത്ത് അവന്റെ പോക്കറ്റിൽ നിന്നും ക്യാപ് ഊരി വീഴാൻ സാധ്യതയുണ്ട്
ബിബിൻ : അങ്ങനെയെങ്കിൽ അവൻ ഇന്റെര്വല് ഇന് പോയ സ്ഥലങ്ങളൊക്കെ നമുക്കൊന്ന് പരിശോധിക്കാം.
ഞാനും ബിബിനും അവൻ ഇന്റെർവെലിന് പുറത്തുപോകാൻ സാധ്യതയുള്ള സ്ഥലങ്ങളില്ലെല്ലാം അന്വേഷിച്ചു
പക്ഷേ ക്യാപ് കണ്ടെത്താനായില്ല.
ഞാൻ : ബിബിൻ , ഇനി നമ്മൾ ഈ സ്കൂളിൽ അന്വേഷിക്കാത്ത സ്ഥലം ഏതൊക്കെയാണ് ?
ബിബിൻ :അങ്ങനെ ചോദിച്ച, പഴയ കഞ്ഞിപ്പുരയും പുതിയ കഞ്ഞിപ്പുരയും പിന്നെ പ്രീ കെജി ക്കാരുടെ പാർക്കും
ഞാൻ : പ്രീ കെജി ക്കാരുടെ പാർക്ക്‌ നമുക്കൊഴിവാക്കാം ബിബിൻ, അവിടെ കഴിഞ്ഞാഴ്ച നമ്മൾ കേറിയപ്പോൾ കിട്ടിയ അടി ഓർക്കുന്നുണ്ടല്ലോ, അതുകൊണ്ട് എന്തായാലും അവിടെ കേറാൻ എബി ധൈര്യം കാണിക്കില്ല. ബാക്കി രണ്ട് സ്ഥലത്തും നമുക്ക് നോക്കാം
അങ്ങനെ ഞങ്ങൾ മറ്റു രണ്ട് സ്ഥലങ്ങളിലും പരിശോധന നടത്തി.
പുതിയ കഞ്ഞിപ്പുരയുടെ പരിസരത്തുനിന്നും ഒന്നും കിട്ടിയില്ല
പക്ഷേ പഴയ കഞ്ഞിപ്പുരയുടെ പുറകിൽ നിന്നും ഞങ്ങളുടെ അന്വേഷണത്തിലെ ആദ്യ വഴിത്തിരിവ് കിട്ടി
ചുളുങ്ങി കൂടിയ നിലയിൽ ലുട്ടാപ്പിയുടെ പടമുള്ള ഒരു നെയിം സ്ലിപ്.
ബിബിൻ സ്ലേറ്റിൽ അതു നോട്ട് ചെയ്തു.
ഞാൻ ആ നെയിം സ്ലിപ് നോക്കി…
ഞാൻ:
ബിബിൻ, ഇത് ഇന്നലെയിറങ്ങിയ ബാലരമയുടെ ഒപ്പം കിട്ടുന്ന നെയിം സ്ലിപ്പാണ്, ഇന്നലെ പപ്പ വാങ്ങിച്ചോണ്ട് വന്നിരുന്നു
ബിബിൻ : ജോർഡി, അങ്ങനെയെങ്കിൽ ഇന്നലെ ഇറങ്ങിയ നെയിം സ്ലിപ് എങ്ങനെ ഇതുപോലെ ചെളിപിടിച്ച അവസ്തത്തിലായി ?
ഞാൻ ആ നെയിം സ്ലിപ് ഒന്നൂടി അനലൈസ് ചെയ്തു.
ഞാൻ :
ബിബിൻ, നമ്മൾ എത്ര പുതിയ ഉടുപ്പിട്ടാലും കളി കഴിയുമ്പോൾ ചെളിയാവില്ലേ, അതുപോലെ ഇതു വെച്ച് എന്തോ കളി നടന്നിട്ടുണ്ട്. തന്നെയല്ല നീ ഈ നെയിം സ്ലിപ് ശ്രദ്ധിച്ചോ, ഇതിന്റെ വശങ്ങളിലാണ് അഴുക്ക്. അതായത് കയ്യിൽ പിടിച്ചും തിരിച്ചും അഴിക്കായതാവാം. നമ്മുടെ സ്കൂളിൽ നെയിം സ്ലിപ് എന്തൊക്കെ കളികളാണ് കളിക്കാറുള്ളത് ?
ബിബിൻ : ചെരുപ്പേറ്, ഒഡോറിവാൻ, കളറ് ഒക്കെയാണ് ഇപ്പോഴുള്ള കളികൾ
ഞാൻ : ഓക്കേ,ബിബിൻ ടിന്റോണിൽ നിന്നും രണ്ട് ഷീറ്റ് നെയിം സ്ലിപ്പ് വാങ്ങണം, ഈ കളികൾ കളിക്കാൻ താല്പര്യമുള്ളവരെയെല്ലാം ഇവിടെ വിളിക്കണം.
ഞാൻ പറഞ്ഞപ്രകാരം ബിബിൻ നെയിം സ്ലിപ്പും വാങ്ങി കളിക്കാൻ കളിക്കാരുമായി വന്നു.
കളിക്കാൻ വന്ന കളിക്കാരിൽ ക്യാപ് നഷ്ടപ്പെട്ട എബിയും ഉണ്ടായിരുന്നു എന്നത് എന്നെ അത്ഭുതപ്പെടുത്തി. അതുകൊണ്ട് തന്നെ ഞാൻ അവനുമായി കളിക്കാൻ തീരുമാനിച്ചു.
മേല്പറഞ്ഞ എല്ലാ കളികളും ഞാൻ അവന്റൊപ്പം കളിച്ചു. എല്ലാ കളികളിലും അവൻ തോറ്റു. അവന്റെ കയ്യിലുണ്ടായിരുന്ന നെയിം സ്ലിപ്പിക്കുകളെല്ലാം എന്റെ കയ്യിലായി.
ബെല്ലടിച്ചപ്പോൾ കളി നിർത്തി അവൻ ക്ലാസ്സിലേക്ക് പോയി.
അവന്റെ കയ്യിൽ നിന്നും കളിച്ചു മേടിച്ച നെയിം സ്ലിപ്പുകളെല്ലാം ഞാൻ സൂഷ്മ നിരീക്ഷണം നടത്തി . ചില നിഗമനങ്ങളിലെത്തി .
ഞാൻ : നീ ഇതു ശ്രദ്ധിച്ചോ, എബിയുടെ കയ്യിലിരിക്കുന്ന നെയിം സ്ലിപ്പെല്ലാം വ്യത്യസ്തങ്ങളാണ്, ഇത്രയും വ്യത്യസ്ത നെയിം സ്ലിപ്പുകൾ ഒരാളുടെ കയ്യിൽ വരണമെങ്കിൽ അത് ഒരുപാട് പേരോട് കളിച്ചു ജയിച്ചിട്ടുണ്ടാകണം. പക്ഷേ ഇന്ന് അവന്റെ കൂടെ കളിച്ചപ്പോൾ അവനത്ര വലിയൊരു കളിക്കാരനായിട്ട് എനിക്ക് തോന്നിയില്ല.
ബിബിൻ : അല്ല ജോർഡി അതും ഈ കേസും തമ്മിലെന്താ ബന്ധം?
ഞാൻ അവന്റെ കയ്യിൽ നിന്നും കിട്ടിയ നെയിം സ്ലിപ്പുകളിൽ നിന്നും ഇന്നലെ ഇറങ്ങിയ ബാലരമയുടെ കൂടെ കിട്ടുന്ന നെയിം സ്ലിപ്പുകളിൽ മായാവിയുടെ പടമുള്ള നെയിം സ്‌ളിപ്പെടുത്ത് ബിബിനെ കാണിച്ചു.
ഞാൻ : ബിബിൻ, ഇന്നലെ മഴയെത്തുടർന്ന് നമുക്കൊക്കെ അവധിയല്ലായിരുന്നോ, ഇന്നലെയാണ് ഈ നെയിം സ്ലിപ്പുള്ള ബാലരമ ഇറങ്ങിയത്. അപ്പോൾ ഇന്ന് ഈ ഒരു നെയിം സ്ലിപ്പായിട്ട് അവനു കിട്ടണമെങ്കിൽ അത് ഇന്നുതന്നെ ആരോടെങ്കിലും കളിച്ചു ജയിച്ചതാവണം. പക്ഷേ അവന്റെ ഒരു കളി വെച്ചു ജയിക്കാൻ ഒരു ചാൻസുമില്ല. പിന്നെ എങ്ങനെ ഇതൊരെണ്ണമായിട്ട് അവന്റെ കയ്യിൽ ?
ബിബിൻ : ജോർഡി, അവൻ ചിലപ്പോ ആ ഒരെണ്ണമായിട്ട് വീട്ടിൽ നിന്നു കൊണ്ടുവന്നതായിക്കൂടെ.
ഞാൻ : നിനക്കറിഞ്ഞുടെ, അവനു മലയാളം വായിക്കാനറിയില്ല, അവനും അവന്റെ പപ്പയും അമ്മേം ഒക്കെ കുവൈറ്റിലല്ലായിരുന്നോ, അവിടുന്ന് കഴിഞ്ഞ വര്ഷമല്ലേ നമ്മുടെ സ്കൂളിൽ ചേർന്നത്. വായിക്കാനറിയാത്ത അവനു ഒരിക്കലും ബാലരമ വാങ്ങിക്കൊടുക്കില്ല.
കേസ് ഇനി എങ്ങനെ മുൻപോട്ടു കൊണ്ടുപോകണമെന്നറിയാതെ നിന്നപ്പോഴാണ് തെളിവുകൾ കിട്ടിയ സ്ഥലം ഒന്നുകൂടി സന്ദർശിക്കാം എന്നു ബിബിൻ പറഞ്ഞത്. അപ്രകാരം ഞങ്ങൾ ആ പഴയ കഞ്ഞിപ്പുര വീണ്ടും സന്ദർശിച്ചു.
കഞ്ഞിപ്പുരയ്ക്കകത്ത് കിടക്കുന്ന ഒരു പഴയ ഡെസ്ക് അപ്പോഴാണെന്റെ ശ്രദ്ധയിൽ പെട്ടത്.
ഞാൻ : എടാ ഈ ഡെസ്ക് ആരും ഉപയോഗിക്കാത്തതല്ലേ, പക്ഷേ നോക്കിക്കേ, ഇതിന്റെ ചിലഭാഗങ്ങളിൽ മാത്രം പൊടിയൊന്നുമില്ല, എന്നാൽ ബാക്കി എല്ലായിടത്തും ഉണ്ട്.
ബിബിൻ : ജോർഡി, നമ്മൾ അന്വേഷിക്കുന്നത് ഗ്ലിറ്റർ പേനയുടെ ക്യാപ് അല്ലെ ?
എന്തിനാണ് ഈ നെയിം സ്ലിപ്പും ഈ ഡെസ്കും ?
ഞാൻ : നെയിം സ്ലിപ്പ് വെച്ച് കളിക്കുന്ന കളികൾ ഏതൊക്കെയാണെന്ന് ചോദിച്ചപ്പോൾ നീ പറയാൻ വിട്ടുപോയ ഒരു കളിയുണ്ട്. നമ്മുടെ സ്കൂളിൽ വിലക്കിയ കളി,
പേനഞ്ഞൊട്ടിക്കളി. നീ ഈ ഡെസ്ക് ശ്രദ്ധിച്ചോ ഇതിൽ പേനഞ്ഞൊട്ടി കളിക്കുമ്പോൾ നമ്മൾ കൈകുത്തുന്ന രീതിയിലുള്ള സ്ഥലങ്ങളിലാണ് പൊടിയില്ലാത്തത്. അതായത് ഇവിടെ ഇന്ന് പേനഞ്ഞൊട്ടി കളിച്ചിട്ടുണ്ട്. കളിച്ചത്തിൽ ഒരാൾ എബിയാണ്. അതിനു തെളിവാണ് ആ ചുളുങ്ങിയ നെയിം സ്ലിപ്പ്. കളിയിൽ ജയച്ചതും അവനാണ്. പക്ഷേ നമുക്കറിയേണ്ടത് ആരാണ് അവനെതിരെ കളിച്ചത് എന്നാണ്. തോറ്റ ആ കളിക്കാരനെയാണ് ഇനി നമ്മൾ കണ്ടെത്തേണ്ടത്.
ബിബിൻ : അതാരാണെന്ന് അറിയണമെങ്കിൽ എബിയെ ചോദ്യം ചെയ്യണം
അടുത്ത ഇന്റെർവെലിന് ഞങ്ങൾ എബിയെ കണ്ടു.
ഞാൻ : എബി, വെറുതേ എന്തിനാടാ ആ റിബിനാ നിന്റെ പേനയുടെ ക്യാപ് കളഞ്ഞെന്നു കള്ളം പറയുന്നേ ?
അതുകേട്ട എബി ദേഷ്യത്തോടെ പറഞ്ഞു
“അവനു എഴുതാൻ കൊടുത്തിട്ട് തിരിച്ചു തന്നപ്പഴാ കാണാതായത് “
പെട്ടെന്ന് ബിബിൻ അവനോടു ചോദിച്ചു ” ആരായിരുന്നു ഇന്ന് നിന്റെകൂടെ പേനഞ്ഞൊട്ടി കളിച്ചത് ? “
എബി : പേനഞ്ഞൊട്ടിയോ ഞാനെങ്ങും കളിചില്ലേ
ഞാൻ : വെറുതേ നുണപറയണ്ട, നീ കളിച്ചു, ജയിക്കുകയും ചെയ്തു, നിനക്ക് നെയിം സ്ലിപ്പ് കിട്ടുകയും ചെയ്തു. സത്യം പറഞ്ഞോ ഇല്ലെങ്കിൽ പേനഞ്ഞൊട്ടി കളിച്ച കാര്യം ഞാൻ ടീച്ചറോട് പറയും. അറിയാല്ലോ പിടിച്ചാൽ നിന്റെ ക്യാപില്ലാത്ത പെനേം കൂടി പോകും
ഏറെ നേരം പിടിച്ചു നിൽക്കാൻ അവനു കഴിഞ്ഞില്ല. ഒടുവിൽ സമ്മർദ്ദങ്ങൾക്ക് വഴങ്ങി അവൻ പറഞ്ഞു
” മൂന്ന് എ യിലെ അരുൺ വർഗീസ് “
ബിബിൻ അത് അവന്റെ സ്ലേറ്റിൽ കുറിച്ചിട്ടു
പിന്നീട് ഞങ്ങളവനെ അന്വേഷിച്ചു. അവസാനം സ്കൂൾ ഗ്രൗണ്ടിന്റെ ഒരു മൂലയിൽ ഏകനായ് കണ്ടെത്തി. അവന്റെ മുഖത്ത് വിഷാദം തളംകെട്ടി നിൽപ്പുണ്ടായിരുന്നു.
എബിയുടെ കയ്യിൽ നിന്നും എനിക്ക് കിട്ടിയ നെയിം സ്ലിപ്പെല്ലാം ഞാൻ അവന്റെ പോക്കറ്റിലിട്ടുകൊടിത്തിട്ട് അവന്റടുത്തിരുന്നു.
ഞാൻ : എന്താടാ ? എന്തിനാ നീ ആ ക്യാപ് എടുത്തത് ? ദേ അവൻ നിന്റെ കയ്യിൽനിന്നും കളിച്ചു ജയിച്ച നെയിം സ്ലിപ്പുകൾ.
അതു കണ്ടപ്പോൾ അവന്റെ മുഖത്തുനിന്നും വിഷാദം പറന്നകലുന്നത് ഞാൻ കണ്ടു. അരുൺ ഒന്നും പറയാതെ വിശ്വ വിഖ്യാതമായ ആ ക്യാപ് അവന്റെ പോക്കറ്റില്നിന്നും എടുത്ത് എനിക്ക് തന്നു. എന്നിട്ട് ഞാൻ കൊടുത്ത നെയിം സ്ലില്പും പോക്കറ്റിലിട്ട് സന്തോഷത്തോടെ ഓടിപ്പോയി.
ക്യാപ് ഗ്രൗണ്ടിൽ കിടന്നു കിട്ടിയതായി ഞങ്ങൾ ഹെഡ്മാസ്റ്ററിനെ അറിയിച്ചു, റിബിൻ കുറ്റക്കാരനല്ലെന്ന് കണ്ടെത്തി മഞ്ചും കൊടുത്ത് വെറുതേ വിട്ടു. ക്യാപ് കിട്ടിയതോടെ എബി ഹാപ്പിയായി. നെയിം സ്ലിപ്പ് കിട്ടിയപ്പോൾ അരുണും.
അന്ന് സ്കൂൾ വിട്ടു വീട്ടിലേക്കു പോകും വഴി ഞാൻ ബിബിനോട് ചോദിച്ചു
” ഡാ എന്തുകൊണ്ടാണ് അരുൺ ക്യാപ് തിരിച്ചു തന്നതെന്നു നീ ചിന്തിച്ചോ ? “
ബിബിൻ : അത്, അവന്റെ നെയിം സ്ലിപ് തിരിച്ചു കിട്ടിയത്കൊണ്ട്
ഞാൻ : എടാ, കളിച്ചു ജയിച്ച സാധനം വെറുതേ തിരിച്ചു കൊടുത്തപ്പോൾ ഒരു നാണോമില്ലാതെ വാങ്ങാൻ അവനെങ്ങനെ തയ്യാറായി ?
ബിബിൻ : അതവന് നാണമില്ലാത്തോണ്ടായിരിക്കും
ഞാൻ : അല്ലട, അതിനൊക്കെ വ്യക്തമായ ഒരു കാരണം ഉണ്ട്
ബിബിൻ : എന്ത് കാരണം ?
ഞാൻ : എടാ അവന്റെ ആ പേനയുടെ ക്യാപ് നീ ശ്രദ്ധിച്ചോ അതിലെ ആ ഗോൾഡൻ റിങ് നീ ശ്രദ്ധിച്ചോ ??? ആ റിങ് ഉള്ളതുകൊണ്ട് പേന ഞൊട്ടി കളിക്കുമ്പോൾ എങ്ങനെ അടിച്ചാലും പേന താഴെ വീഴില്ല. അതിങ്ങനെ കറങ്ങി നില്കും. അങ്ങനെയാവാം എബി ജയിച്ചതും അരുൺ തോറ്റതും.
അതുകൊണ്ടാവാം അരുൺ എബിയുടെ പേനയുടെ ക്യാപ് മാത്രമായി മോഷ്ടിച്ചതും